Nëus Jëuni Gherdëina

La  Nëus Jëuni Gherdëina,  che fej da tët a autra 28 lies ie unida metuda su l ann 1985. Doi ani dant, l ann 1983,  fova unides ora leges che udova dant de sustenì y judé lies y urganisazions che lëura cun y per i jëuni. La singula grupes che laurova cun i jëuni pitova na majera vela de ativiteies y manifestazions. Propi te chisc ani iel stat n gran svilup tl lëur cun i jëuni. L univa ënghe dant che vel manifestazions univa fates l medemo di o che plu lies pitova plu o manco medema ativiteies. Perchël fovel debujën de coordiné la gran cumpëida de manifestazions che univa metudes a jì.

D’autonn dl 1985 fova nscila unida metuda su la “Nëus Jëuni”. Chësta nueva istituzion dassova fé da tët a plu lies de Gherdëina y coordiné y sustënì l’ativiteies cun i jëuni. Ma ënghe tò su cuntac cun d’autra istituzions ora dla valeda, specialmënter cun la Val Badia y mo cun autra assoziazions che lëura cun jëuni. Ora de chël ulova la Nëus Jëuni ënghe fé da mediatëur danter i jëuni y l’autoriteies. Chësta istituzion à scumencià si lëur cun gran ntujiasm. Per l prim iede iel unì metù a jì l’enes di jëuni, na festa deberieda cun i jëuni dla Val Badia, trasmiscions sun Radio Gherdëina y  nscì inant.

La leges per sustenì i jëuni udova mé dant na suvenzion de un n iede, ma la singula grupes fova dutes a una y ulova purté inant chësta iniziativa y perchël ie unì mudà d’autonn dl 1987 l inuem te "Grupa Nëus Jëuni". L ann 1998 ie l inuem mo n iede unì mudà y ie coche al didancuei "Nëus Jëuni Gherdëina".

Da l ann 1998 nchina aldidancuei iel unit stat fat de gran vares inant, da un n laurant te ufize (tl ann 1998) iel ncuei  3 lauranc a tëmp plën. Doi lëura dantaldut cun la coordinzion y urganisazion dla manifestazions dla lies che fej pert dla Nëus Jëuni Gherdëina. La terza persona lëura tl nuef luech d’ancunteda per i jëuni “Saut” tla Cësa per Jëuni, Ert y Cultura de Urtijëi.